Ədalət Partiyasının sədri İlyas İsmayılovun oğlu Etimad İsmayılovun məhkəməsi Çelyabinskin mərkəz rayon məhkəməsində davam etdiriləcək. lent.az-ın “mega-u.ru” saytına istinadən verdiyi məlumata görə, vilayət məhkəməsi müdafiə tərəfinin işin Moskvaya keçirilməsi barədə vəsatətini rədd edib.
Azərbaycan prezidenti İlham Əliyev baba olub. ANS-in dövlət başçısının ailə üzvlərinə istinadən verdiyi məlumata görə, İlham Əliyevin qızı Leyla Əliyevanın ABŞ-dakı klinikada iki oğlu anadan olub. Körpələrin və ananın vəziyyəti normaldır.
Rəsul Quliyevin lideri olduğu ACP növbəti bələdiyyə və parlament seçkilərində birgə iştirak etmək üçün bəzi partiyalarla danışıqlara başlayıb. ACP sədrinin müavini Yaqub Abbasov bu barədə APA-ya məlumat verib. Onun dediyinə görə, danışıqlar prezident seçkisində iştirak edən partiyalarla aparılır. Danışıqların təzəcə başladığını deyən Y.Abbasov hələlik konkret razılıq əldə olunmadığını bildirib. O, danışıqların sonunda ACP ilə yeni mövqedə olan siyasi partiyaların blokunun yaradılmasının da nəzərdə tutulduğunu qeyd edib.
İki həftə sonra özünün təsis qurultayını keçirməyi planlaşdıran Aydınlar Partiyasına növbəti tansferlər olub. Partiyanın təşkilat komitəsindən aldığımız məlumata görə, AXCP-nin Ali Məclis üzvü, Lerik rayon təşkilatının təmsilçisi Abdul Ramazanov və AXCP Lerik rayon təşklatının Məclis sədri Allahverən Mirzəyev partiya sıralarını tərk edib.
Astara Rayon Hərbi Komissarlığından hərbi xidmətə çağırılan əsgər Qurban Nuriyevin “dedovşina”ya məruz qalması ilə bağlı mətbuat konfransı keçirilib. Silahlı Qüvvələrə Demokratik Vətəndaş Nəzarəti Mərkəzinin direktoru Ələkbər Məmmədov 2008-ci ilin iyulunda hərbi xidmətə çağırılan və Ağdamdakı “N” saylı hərbi hissədə xidmət edən əsgərin dəfələrlə müxtəlif təzyiq və işgəncələrə məruz qaldığını deyib.
Tanınmış vəkil Aslan İsmayılov dünən redaksiyamıza müraciət edərək Nizami rayonu ərazisində meşə zolağının məhv edildiyini söylədi. Minlərlə ağacın qırıldığı meşə zolağında olduğunu söyləyən A.İsmayılov bizi də əraziyə dəvət etdi. Ərazidə olarkən orada qızğın tikinti işlərinin getdiyinin şahidi olduq. 11 hektar ərazisi olan yaşıllıqda minlərlə ağac kəsilib. Ağaclardan “təmizlənmiş” sahədə isə kotteclər tikilir. Tikintini aparan şirkətə məxsus traktorlar kəsilmiş ağacların kökünü qazıb yeri hamarlayırdı.
NATO ölkələrinin xarici işlər nazirləri dünən Brüsseldə toplanıblar. Görüşdə Gürcüstan və Ukrayna ilə Şimali Atlantika Alyansı çərçivəsində əlaqələrin dərinləşməsi, bu ölkələrin təşkilata üzvlük perspektivləri əsas məsələlərdən biridir.
“əl-Qaidə” lideri Üsamə bin Laden “cihad döyüşçülərini” Qərbə qarşı nüvə silahı ilə hücum təşkil etməyə çağıracaq. Amerikanın “ABC News” telekanalının kəşfiyyat və hüquq - mühafizə orqanlarındakı mənbələrə istinadən verdiyi xəbərə görə, bin Ladenin yeni videorolikinin yaxın 24 saatda internetdə yayılması gözlənilir. Mənbə deyib ki, “əl-Qaidə” lideri Qərb ölkələrinə qarşı yeni hücumlar təşkil etməyə, bu zaman bioloji, kimyəvi və nüvə silahından istifadə etməyə çağıracaq.
Bakının Nizami rayonundakı 4 saylı meyvə-tərəvəz (“8-ci kilometr”) bazarında dəllallar peyda olub. Əvvəllər müştəriləri çəkidə aldadanlar indi də alıcılara pul atmağa girişiblər. Bu barədə “Yeni Müsavat”a Bakı sakini Nizami Kərimov məlumat verib.
Bakıda axtarışda olan 7 nəfər həbs edilib. Onlardan 2-si qadındır. Bu barədə lent.az-a Bakı Şəhər Baş Polis İdarəsindən məlumat verilib. Xəbərə görə, Əzizbəyov rayonunda Cinayət Məcəlləsinin 263-cü (yol hərəkəti və nəqliyyat vasitələrinin istismarı qaydalarını pozma) maddəsi ilə axtarışda olan 1981-ci il təvəllüdlü Vüsal Vahid oğlu Səmədov, Nərimanov rayonunda Cinayət Məcəlləsinin 178-ci (dələduzluq) maddəsi ilə axtarışda olan 1961-ci il təvəllüdlü Sücayət Nağı qızı Məmmədova və Cinayət Məcəlləsinin 182-ci (hədə-qorxu ilə pul tələb etmə) maddəsi ilə axtarışda olan 1984-cü il təvəllüdlü Müzəffər Zülfüqar oğlu Osmanov həbs edilib.
Neftin dünya bazar qiymətinin 140 dollardan 50 dollaradək düşməsinin əsas səbəblərindən biri kimi Amerika üçün “qara qızıl”ın iqtisadi faktordan daha çox siyasi faktora çevrilməsi göstərilir. Belə ki, ABŞ bu ilin iyul ayından başlayaraq neftin qiymətinin azalmasında maraqlı tərəf kimi çıxış edir.
Xəbər verdiyimiz kimi, Milli Bank (MB ) mərkəzləşmiş kreditlər üzrə faiz dərəcəsini üçüncü dəfə aşağı saldı. Artıq ölkədə uçot stavkası 8 faiz təşkil edir. Faiz dəhlizinin yuxarı həddi isə 13, bankların həm manat, həm də xarici valyutalara dair öhdəlikləri üzrə məcburi ehtiyat norması 6 faizdir. MB-nin son addımları nəticəsində kommersiya banklarının əlavə vəsait əldə edəcəyi proqnozlaşdırılır. Eyni zamanda yeni qaydalara görə, mərkəzləşdirilmiş kreditlər 8 faizlə bölüşdürüləcək.
“Azadlıq” qəzetinin həbsdə olan baş redaktoru Qənimət və satirik şair Sakit Zahidovların atası Səlim Zahidov dekabrın 1-dən 2-nə keçən gecə 90 yaşında vəfat edib. “Azadlıq” qəzetinin direktoru Azər Əhmədovun verdiyi məlumata görə, S.Zahidov dünən səhər son mənzilə yola salınaraq, bütün ömrünü yaşadığı Meysəri kəndinin qəbiristanlığında dəfn edilib. Dünən media camiyəsində ən aktual müzakirə mövzusu isə Zahidov qardaşlarına atalarının dəfnində iştirak etməyə icazə verilib-verilməyəcəyi ilə bağlıydı.
ATƏT-in media azadlığı üzrə xüsusi nümayəndəsi Mikloş Haraşti təşkilatın Daimi Şurasına ATƏT məkanında media azadlığının vəziyyətinə dair hesabat göndərib.
Rövnəq Abdullayev AFFA prezidenti seçiləndən az sonra Bakı klublarının çoxluğunu nəzərə alaraq onlardan bəzisinin adlarını dəyişərək Bakıətrafı qəsəbələri təmsil etməsi təklifini irəli sürmüşdü. Federasiya başçısı bununla həmin klubların azarkeş dəstəyinin artacağını bildirmişdi. Ancaq həmin vaxt Bakını təmsil edən əksər klublar bu ideyaya qarşı çıxdılar.
Peşəkar Futbol Liqasının prezidenti Ramin Musayev ötən gün premyer-liqanın birinci dövrəsinin yekunları ilə bağlı keçirdiyi mətbuat konfransında bəzi maraqlı fikirlər səsləndirib. qol.az-ın məlumatına görə, R.Musayev gələn ildən premyer-liqada çıxış edən komandaların sayının 14-dən 12-ə endiriləcəyini və hər bir klubun dörd dövrə olmaqla, 32 oyun keçirəcəyini bildirib.
“Yeni Müsavat”ın ötən saylarında meyxanaçı Vüqarla müsahibədən sonra onun həmkarı Mehman Əhmədli redaksiyamıza dönə-dönə zəng edib müsahibə vermək istədiyini bildirdi: “Mən Vüqarın müsahibəsindəki bəzi məqamlarla qətiyyən razı deyiləm”. Biz meyxanaçını redaksiyaya dəvət edib onu dinlədik. Mehman Əhmədli 1974-cü ildə Əhmədli qəsəbəsində anadan olub. Dediyinə görə, orta məktəbdə oxuyarkən meyxanaya maraq göstərib. Ağasəlim Çildağ və Nizamidən öyrənib. Elə o vaxtlar meyxana yazıb məhəllə uşaqlarına oxumağa başlayıb.
Məlum olduğu kimi, ATV telekanalının “El içində” verilişinin çəkilişində qalmaqal baş verib. Müğənni Vasif Məhərrəmli “ANS-Press”in nəşri olan “Sarı” jurnalının əməkdaşı Vüqar Kamiloğlunu döyüb. Show.az-ın yazdığına görə, qalmaqal əvvəlcə mübahisə zəminində baş verib.
